Chat With Me..

Tuesday, July 14, 2009

Pengingat di Menua Betong.

Biar Mati Di Tangan Sulu

Beraie Nyabak Ka Nuan...

Sulu,
Betaun tua udah nanggam pengerindu, tua sama bela udah nemu ulah perangai diri. Sekumbang tua ka begulai, ati aku chukop lantang, penyayau aku sigi ba nuan siku aja, pengerindu enggau penyayau aku ka nuan nadai kala bebagi dua. Taja tua enda berimbai tang nuan tetap ba ati aku belama.

Sulu,
Betaun tua udah begulai, tua sempama baka bungai udah setangkai, tua nadai kala madah ka diri leju enggau pangan diri. Maya begulai, tua sama bela gaga ati. Nuan madah sayau, aku madah rindu...munyi ko leka lagu, "nuan nyadi bungai, aku nyadi kesulai". Sari tua enda betemu tauka betungga mua, tua sama bela madahka pengelenggau ngagai pangan diri, munyi ko leka lagu, “jauh ba mata tang semak ba ati”.

Sulu,
Amat munyi ko jaku urang, pengerindu kelalu lama ditanggam tau sereta nemu ngasuh pengerindu berubah. Diatu nuan nyau udah berubah ati, suba nuan madah sayau tang diatu nuan madah benchi. Suba nuan bejanji enggau aku, sigi enda berubah ati sampai mati tang diatu janji nuan mina tinggal janji….nuan bula ka semaia diri, nuan enda ngamat ka janji diri. Aku enda nemu nama kabuah nuan tau berubah ati. Aku nadai kala ngemedis ka ati nuan, aku nadai kala ngayah sereta bula ka nuan. Pengerindu aku ngagai nuan tetap enda berubah, aku sigi rindu ka nuan belama taja pen nuan udah ninggal ka aku. Enda mudah aku ka ngelengka ka nuan.

Sulu,
Aku nemu nuan udah berubah ati kategal nuan udah bisi laki bukai…munyi ko urang, udah bisi adong belalai. Nuan kala madah sigi enda mudah ngiga laki bukai tang…diatu?? Nuan bula ka jaku diri, nuan enda netap tauka ngamat ka jaku diri….nuan sulu pembula!! Sampai ati nuan ngaga aku bakatu... Aku andal ati amat ninga jaku semaia nuan suba, maya nuan madah sigi tetap jadi enggau aku taja pen apai indai nuan enda setuju, “nadai utai tau nanggul tua”, pio ko nuan suba, tang ke diatu ukai apai indai nuan enda setuju aku jadi enggau nuan tang nuan empu ka enda setuju jadi enggau aku. Nuan semina madah, “udah ukai nasib tua ka jadi”. Nuan udah nemu aku sigi keran amat ka nuan, nuan pen udah nemu aku mina rindu ka nuan siku aja. Pengerindu aku sigi endang amai sulu, aku enda bebagi ati enggau nuan, pengerindu aku enda mudah lela baka lela gula enggau garam.

Sulu,
Nadai aku nyangka nuan berubah ati lalu ngiga laki bukai dikena nukar pengerindu aku ngelamatu….sampai ati nuan ngaga aku bakatu. Nama meh pengurang aku ngunjong ka nuan sanggup ngiga laki bukai?? Nama meh pengelebih iya ari aku?? Iga ga nuan nadai berasai ati sinu ngenang kaul tua suba ka udah 3 taun begulai..

Sulu,
Taja pen nuan nadai agi begulai enggau aku, aku tetap ingat ka nuan belama. Nuan meh indu ka keterubah enggau ka penudi ka pengidup aku. Taja pen ila lusa aku bisi indu bukai ka ganti nuan, nyangka aku enda ulih meri pengerindu aku ngagai iya baka pengerindu aku ngagai nuan. Sulu, tu meh tanda penalam pengerindu aku ngagai nuan.

Sulu,
Lapa meh nuan sanggup ngaga aku bakatu? Nama penyalah aku digaga nuan bakatu? Lapa nuan enda ingat ke semaia tua suba?

Tuesday, June 30, 2009

Chara Keterubah Nyelamat Urang Ka Kena Strok..

Bisi siti chara tauka jalai keterubah ka manah dikena kitai nyelamat ka urang ka kena Strok. Chara tu taja pen ulih nyelamat ka nyawa, ia mega nadai mai penanggul ka bukai ngagai urang ka kena strok. Chara tu mega tau dikumbai kitai bantu tasah (darurat) ka ulih meri 100% hasil ka manah.

Baka ka udah ditemu kitai, maya urang ka kena strok tu dia semua darah dalam tuboh sida iya deka bejalai enggau laju/deras nuju ngagai buloh darah ba untak sida iya. Enti bantu lubah diberi, dia buloh darah sida iya enda ulih ngetan ka pengelaju/peneras darah ka bejalai lalu tu deka ngunjong ka buloh darah ba untak sida deka pechah.

Maya ka betempuh enggau utai bakatu, kitai anang sekali kesal ati, anang takut tang mina jenuh (tenang) aja. Anang mindah ka urang ka kena strok nya laban enti kitai mindah ka iya, tu ulih ngasuh buloh darah ka mit dalam untak iya jampat tauka mudah agi pechah. Kitai mina ulih nundok ka iya aja ngambika iya enda labuh baru lalu maya tu meh kitai patut ngemansut ka darah iya.

Jalai ka manah kena kitai ngemansut ka darah iya ianya ngena jarum jek lalu enti nadai kitai tau ngena jarum jait tang jarum nya misti ditunu ba api dulu.

Udah jarum jait nya ditunu, achuk ka jarum nya ngagai 10 iti ujong tunjuk urangnya lalu jarum nya di achuk kira-kira 1cm penalam ari ujong kukut. Tiap tunjuk mina di achuk sekali aja awakka darah ulih pansut lalu enti darah enda tentu ulih pansut, kitai tau michit tunjuk urangnya ngambika darah iya ulih pansut.

Kira bisi udah 10 minit, dia urangnya deka ngeleda mimit. Enti mulut urangnya dipeda singit tauka enda normal, dia kitai dasuh narit 2 iti pending urang nya sampai mirah. Udanya, achuk 2 piak baruh pending ngena jarum ka dikena tadi sampai bisi darah pansut. Enggau chara tu, mulut urangnya deka pulai ngagai normal baru.

Udah urangnya amat-amat ngeleda sereta nadai penanggul bukai, dia kitai tau mai urangnya ngagai sapital tauka klinik enggau likun ngambika ulih nerima bantu ari lutor.