Dunya makin mansang, penemu pen makin mansang, ulah & perangai pen sereta mansang…pemansang dalam pengidup kitai sigi endang patut kelebih agi enti pemansang nya mai ka pemanah ngagai pengidup kitai. Tang enti pemansang ka digaga tauka dikereja kitai nya nadai meri pemanah, nadai pulai ka penguntong, nyadi pemansang nya enggai nyadi terus dikemansang ka agi.
Sebedau ngerintai ka jaku panjai agi, dulu aku minta ampun ngagai semua kita enti jaku/randau aku tu bisi ngait/nyangkut ati kita, bisi ngasuh kita enseriban ati tauka ngasuh ati kita enda nyamai...randau tu mega ukai ka nyalah ka sapa-sapa kelebih agi sida ka rebak baru diatu, ukai mega ka nyalah ka sida 100%...minta ampun sekali agi.
Utai ka deka dikenang aku enggau semua kitai ianya bekekang ka JAKU IBAN, ADAT IBAN & MAIN ASAL IBAN...tau dipeda anembiak rebak baru diatu, berapa mayuh sida ka landik & pandai bejaku Iban? Berapa iku sida ka nemu main asal kitai Iban?? Berapa iku sida iya nemu tauka mereti ka adat kitai Iban??? Aku ukai ka madah kadiri nemu semua utai tu tang ka ngelansa mimit penemu diri aja.
Ba pengelandik Jaku Iban, jaku Iban meh siti ari bansa jaku ba dunya tu ka chukop manah tauka unik ari jaku bansa bukai...kabuah aku madah munyi nya, laban jaku Iban ngembuan mayuh macham bansa jaku, kitai bisi Jaku Dalam, Jaku Sempama, Jaku Kelaong, Jaku Silup enggau mayuh macham jaku ka bukai....Tang semua utainya nadai reti enti enda dikemansang lalu punas dudi hari ila. Mayuh amat anembiak Iban rebak baru diatu kurang bejaku Iban, sida landik tauka nemu agi bejaku ribai & jaku laut, ukai ka nyebut pengelandik nya salah tang enti enggau bansa diri agi ga bejaku bansa bukai, utainya bisi nyelaie mimit dipeda/didinga aku.
Ba pengelandik dalam Main Asal kitai Iban, mayuh amat main asal kitai Iban udah enda dimain ka kitai agi diatu...ambi ka banding baka Pantun, Beganu, Beramban, Nimang, Bedungai & begiga Entelah. Main asal tu dipeda aku makin nadai/punas, mina bisi didinga ba radio aja. Kelimpah ari nya, main asal ka bukai nyau ka punas ka dipeda aku ianya Ngajat & Betaboh. Maya ka ngintu Hari Gawai apin lama tu tadi, aku berasai ringat sereta pedis ati meda kitai Iban di rumah panjai nyau kelalu mansang dalam dunya teknologi..kabuah aku pedis ati laban pemansang nya nyau ngerugi ka bansa kitai Iban empu...ka ngajat nyau enggai betaboh agi laban ka udah bisi VCD dipasang, bisi sekeda enggai ngajat laban ka bedisko, ka bepoco-poco & ka belagu (kahuke)...enda ibuh sebut urang ka anembiak, urang tuai ka diatu pen nyau enggai betaboh, sida rindu agi bepoco-poco, nyau sekayu rumah panjai sida ka tuai nemu/landik bepoco-poco (ngalah sida ka anembiak).. Kati patut dikemansang ka agi pemansang bakatu???? Enti betaboh nyau enggai, ngajat pen nyau enggai, bakani ka ngetan ka main asal kitai Iban ka dudi hari ila????
Ukai ka muji diri, aku chukop gaga ati enti ditarit/dibatak urang ngajat tang aku tusah ati enti dasuh urang ngajat bekena ka VCD.. Tawak, engkrumong, bebendai & gendang/bidap ditusun manah ba bilik tang enti enda dikena, enda ditaboh pen nadai guna...pereka utai tu sigi endang patut disimpan nyadi ka pesaka (nyadi ka pengeraja keno ko sekeda) tang nadai salah enti utai tu dikena betaboh maya Hari Gawai laban maya nya meh kitai ngintu pengerami bansa Iban tang ukai bansa urang bukai.
Bekenang ba Adat Iban, kitai Iban ngembuan chukop mayuh adat kelebih agi adat ba rumah panjai, ambi ka banding baka Adat Ngelalu Ka Temuai, Adat Ngintu Pemati (Niki Ka Bangkai, Nurun Ka Bangkai, Ngetas Ulit, Nyungkop, Muai Entebalu...), Adat Mandi Ka Anak Mit, Adat Bebelah Pinang, Adat Ngemai Anak Ke Ruai enggau adat-adat ke bukai. Dipeda aku mayuh amat adat kitai Iban tu nadai agi kena tauka kurang agi dikena, baik di rumah panjai tauke di nengeri. Mayuh urang madah, adat-adat lama kitai Iban enda tau dititih/dikena ka agi kategal udah bisi pengarap baru (Kristian) tang ba penemu aku adat-adat tu nadai salah dititih/ditunda tang kitai tau ngena chara besembiang, ngena leka sampi sembiang, nyadi utainya enda/nadai belaban enggau pengarap Kristian.
Sapa ulih ngemansang & ngetan ba Jaku Iban, Adat Iban & Main Asal Iban enti enda bansa kitai empu. Suah kitai nyebut jaku tu, ”nadai tuboh sida ka tuai ganti enggau tuboh kami...” tang leka jaku nya nadai mai reti enti enda dikereja, anang aja mina ”mulut nyebut tang patung enda nyaut”. Anang nyalah ka sapa-sapa nyema Jaku Iban, Adat Iban & Main Asal Iban nyau punas dudi hari ila tang dulu nyalah kadiri empu...kitai empu ka enggai ngemansang ka pengelandik bansa diri, bakani urang bukai ka ngemansang ka bansa kitai???
Ujong jaku ari aku, sekali agi aku minta ampun nyema randau/jaku aku tu ti ngasuh ati kita ringat tauka pedis ati...
