Sapa aku???

Enti nitih ka ajar dalam Gerija tauka ajar/pesan ari apai-indai, semua kitai ka idup dalam dunya tu patut idup manah, badas & bebasa enggau pangan diri. Enti semua kitai dalam dunya tu nitih ka semua ajar/pesan tu, 100% urang dalam dunya sigi nadai belaya, bejai, ngutok, betenah & enggai bepeda enggau pangan diri, semua kitai idup enggau senang sereta lantang…

Apai-indai patut manah enggau bala anak, pia mega bala anak patut bebasa & badas enggau apai-indai…aki-ini patut manah enggau bala uchu-ichit lalu pia mega bala uchu-ichit patut bebasa & badas enggau aki-ini….bala entua patut manah enggau bala menantu lalu menantu patut bebasa sereta badas enggau entua diri..utai tu chukop manah didinga pending sereta manah dipeda mata…apai-indai mega lantang ati enti bala anak sida manah perangai, bisi adat basa sereta nyadi anak ka beguna…

Tang!!! Enti kitai meda dunya ke diatu, semua utai ka disebut aku datas nya bisi udah bebali tauka tekalih…kabuah aku madah munyi tu laban ke diatu, mayuh bala apai-indai nyau jai enggau bala anak lalu bala anak nyau enggai/enda bebasa ka apai-indai…iya ka jai agi, apai-indai sanggup munoh/ngukom anak kandung diri empu & sanggup bebuai ka anak dalam kandung (abortion)….ba penemu aku, utai bakatu enda patut nyadi laban enti apai-indai udah berunding ka bisi anak, retinya sida udah mutus ati ka nerima anak ka dikandung sereta diada ka sida….

Enti ulah apai-indai kandung nyau enda indah-indah baka jelu, kati patut bala anak bebasa & manah enggau sida??? Kitai ka nyadi anak pedis amat ka nyaut tanya tu…bisi madah, “taja sida jai tang sida tetap apai-indai diri empu” lalu angka mega bisi ka madah, “baik apai-indai udah jai enggau anak, ending patut meh anak jai enggau apai-indai”….ka manah bendar, tanya tu patut ditanya ngagai diri kitai empu ka udah nyadi anak...

Bala anak nyau belaya, bebukut & bejamah enggau apai-indai, aki-ini & aya-ibu sampai bisi bala sekeda nyau kempang bebunoh ka apai-indai diri…nama kabuah anak tau ngembuan ulah-pendiau bakatu? Nama kabuah anak jai enggau apai-indai?? Ari ni pun penatai ulah-pendiau anak ka enda manah tu??? Patut tauka enda apai-indai disalah dalam hal ulah-pendiau anak bakatu ????

Enti udah berumahtangga tauka udah kawin, entua nyau belaya, bejaku jai & ngutok bala menantu lalu bala menantu pen bakanya mega….nama kabuah utai tu patut nyadi? Nama kabuah entua perlu belaya enggau menantu ?? Nama kabuah menantu perlu nunda penyai entua ??? Kitai ka udah berumahtangga nemu bakani ka nyaut tanya tu….ba aku, enti kitai udah sanggup nyadi menantu urang bukai, retinya kitai sanggup nerima entua kitai nyadi ka apai-indai lumor 2 dalam ruang bilik kitai, pia mega entua patut sanggup nerima kitai nyadi ka menantu sida…nyadi enti semua utai tu udah bakatu, sigi enda patut laya nyadi dalam ruang bilik kitai ka udah berumahtangga..

Enda puas belaya, bejamah & bejaku jai enggau diri sebilik, laya nyau ngelengkai ngagai laki-bini….laya suah ka nyadi antara apai & indai kategal bala anak…apai enda setuju indai nganu/ngukom bala anak tauka indai enggai meda apai nganu bala anak…pandak jaku, apai enda sepenemu enggau indai…lain ko apai, lain ko indai….dalam ruang bilik ka lantang/bahgia, utai bansa tu enda patut nyadi…..kategal laya ka mit, sampai bisi ka sarak kategal anak mega….kati patut laki-bini sarak kategal tu ? sapa ka untong, sapa ka rugi ?? kati sarak tu ulih nyelesai ka laya ??? Nya alai, apai-indai patut berunding panjai sebedau mutus ati ka sarak enggau pangan diri....

Pandak jaku ari aku pasal semua cherita ba datas nya, tiap-tiap iku kitai dalam dunya tu sama bela ngembuan tanggungjawab diri empu dalam kitai ngerapat ka kaul kitai enggau urang bukai, enda milih urang nya dikelala tau enda dikelala kitai…enti kitai meda, suah agi laya nyadi dalam ruang bilik kitai empu..nya alai, sebedau utai ka berat agi nyadi tauka penusah ka besai agi nuntong ruang bilik kitai, uji meh kitai berunding & ngiga jalai/chara bakani mutar ka utai bakatu ngambi ka enda nyadi…

Aku agi ingat ka siti jaku pesan ari siku bakih aku, ko iya, "apai-indai meh petara dalam dunya tu, laban enti nyadi apai-indai, kitai enda ulih ada ba dunya tu.."

SRB St. Francis Xavier...sinu ati meda!!!

Sekolah Rendah Bantuan St. Francis Vavier digaga tauka dentak ka urang maya taun 1883 suba, retinya, sekula tu udah 127 taun digaga ba menua pesisir tungga ke Batang Rajang ianya menua ka dikumbai Kanowit. Sekula tu digaga enda jauh ari pasar Kanowit, semina beberapa singkang aja ari pasar Kanowit.

Enggau temegah ati aku madah kadiri chukop gaga ati laban ka udah sereta udah belajar ngiga penemu & pemandai ba sekula ka tau dikumbai sekula chukop "besejarah" tu..kabuah aku ngumbai sekula tu chukop "besejarah" laban sekula tu siti ari sekula ka pengambis lama tauka sekula keterubah digaga ba menua Sarawak, kelebih agi tungga adap ke Batang Rajang. Aku apin besekula ba sekula tu ari primeri 1-6, maya taun 1983-1989 suba...chukop mayuh "pengalaman" manis & pait maya ka besekula maya nya suba, laban aku ka diau ba "asrama"...

Sekula tu udah ngada ka mayuh urang pandai dalam pelajar...bisi sida nya udah nyadi pengajar, nyadi luya, nyadi pegawai perintah, nyadi indu misi sereta mega nyadi YB...terima kasih ngagai urang ribai ka tebuka ati ka niri/gaga sekula tu dulu suba...terima kasih mega ngagai bala pengajar ka udah ngajar ba sekula tu.

Kitai mensia enti udah tuai, selalu disema ka urang "nadai guna" tauka "udah luya"...pia mega enggau pereka utai ka dikena kitai.....tu meh utai ka nyadi ngagai sekula SRB. St. Francis Xavier tu diatu. Kabuah aku madah munyi tu laban sekula tu udah enda diguna/dikena besekula agi laban ka udah bisi rumah sekula ka baru. Sekula tu nyau berupai amat enda dijaga/dintu laban apin lama tu tadi aku bisi pulai ke menua, dia aku berasai sinu amat meda sekula tu nyau repa laban rumput & lalang...nyau baka tembawai lama meh nya...kati utai tu tau nyadi bakanya???

Sekula tu siti ari "bangunan bersejarah" ba menua Kanowit kelimpah ari Kubu Emma...ba penemu aku, "bangunan bersejarah" bakatu, patut digaga nyadi ka siti endur mantai ka utai/pereka lama-lama, ianya muzium....

Utai/pereka lama ukai reti nadai guna....nadai utai ka lama tentu nadai utai ka baru....bepun ari utai lama, bisi utai ka baru....

Sama-sama meh kitai berunding ka utai tu...

Kubu Emma....nyadi tembawai lama!!!

Ari mit suba aku sigi udah meda Kubu Emma tu ba sukut pasar Kanowit...kabuah aku nyebut ba sukut pasar Kanowit laban Kubu Emma tu digaga tauka dentak urang jauh mimit ari pasar Kanowit...

Dulu suba, Kubu Emma tu kala digaga tauka nyadi sekeda upis perintah endur urang begaga ka surat beranak, MyKad (tingki maya nya), surat pemati, surat kawin sereta utai-utai ka bukai...Kubu Emma maya tu, chukop "popular" laban ia siti-siti perintah ka bisi maya nya...mayuh agi cherita sejarah pasal Kubu Emma tu, kelebih agi maya rambau Raja Brooke suba...

Tang diatu, Kubu Emma mina tinggal sejarah aja...Kubu Emma mina tinggal nama, mina tinggal "kenangan"...tau mega dikumbai "udah niang"....sayau pemadu sayau tiap kali aku pulai ke Kanowit, tiap kali meda Kubu Emma....suba nyadi "popular" tang diatu udah nyadi tembawai, udah enda diguna aku....mina rumput & lalang aja ka bisi dipeda "ngibun" Kubu Emma...

Nama kabuah utai ka chukop besejarah bakatu enda dibun tauka digaga tauka dintu awak ka nyadi siti "bangunan besejarah"???